Transmeton Abdullah ibn Umari: Një natë, kah fundi i jetës së tij, i Dërguari i Allahut (s.a.v.s.) na priu në namazin e jacisë. Pasi dha selam, ai u ngrit dhe tha: "A e shihni këtë natë tuajën? Vërtet, pas njëqind viteve nga kjo natë, nuk do të mbetet asnjë njeri mbi sipërfaqen e tokës prej atyre që janë sot mbi të." Ibn Umari tha: Njerëzit i keqkuptuan këto fjalë të të Dërguarit të Allahut (s.a.v.s.) lidhur me atë që u tha për njëqind vitet. Në fakt, i Dërguari i Allahut (s.a.v.s.) kishte për qëllim se askush prej atyre që ishin gjallë atë ditë mbi tokë nuk do të mbetej pas njëqind viteve, dhe se ai brez do të merrte fund.