Transmeton Ebu Seid el-Hudriu:

U nisëm për të kryer Haxhin ose Umren dhe Ibn Saidi ishte me ne. U ndaluam në një vend dhe njerëzit u shpërndanë, kështu që mbeta vetëm unë dhe ai. Ndjeva një frikë të madhe prej tij për shkak të asaj që thuhej për të (se ai ishte Dexhalli). Ai i solli sendet e tij dhe i vendosi pranë bagazheve të mia, e unë i thashë: "Vapa është e madhe, prandaj do të ishte mirë t'i vendosje ato nën atë pemë." Dhe ai ashtu bëri. Pastaj na u shfaq një kope delesh, ai shkoi dhe solli një enë me qumësht e më tha: "Pi, o Ebu Seid!" Unë i thashë: "Vapa është e madhe dhe qumështi është i nxehtë", por në fakt vetëm se nuk dëshiroja të pija nga dora e tij - ose tha: të merrja nga dora e tij.

Atëherë ai tha: "O Ebu Seid, kam menduar të marr një litar e ta var në pemë e pastaj të mbyt veten për shkak të asaj që thonë njerëzit për mua. O Ebu Seid, nëse hadithi i të Dërguarit të Allahut (s.a.v.s.) i mbetet i fshehur dikujt, nuk ka se si t'ju mbetet i fshehur juve, o grup i ensarëve! A nuk je ti një nga njerëzit që e njeh më së miri hadithin e të Dërguarit të Allahut (s.a.v.s.)? A nuk ka thënë i Dërguari i Allahut (s.a.v.s.) se ai (Dexhalli) është kafir, ndërsa unë jam musliman? A nuk ka thënë i Dërguari i Allahut (s.a.v.s.) se ai do të jetë steril dhe nuk do t'i lindë fëmijë, ndërsa unë i kam lënë fëmijët e mi në Medinë? A nuk ka thënë i Dërguari i Allahut (s.a.v.s.) se ai nuk do të hyjë në Medinë dhe as në Mekë, ndërsa unë vij nga Medina dhe jam nisur për në Mekë?"

Ebu Seid el-Hudriu tha: "Gati sa nuk e pranova arsyetimin e tij." Pastaj ai (Ibn Saidi) tha: "Pasha Allahun, unë vërtet e njoh atë, e njoh vendlindjen e tij dhe e di se ku ndodhet ai tani." Atëherë i thashë: "Qofsh i shkatërruar gjatë gjithë ditës!"