Na njoftoi Maliku, na tregoi Seid ibn Ebi Seid el-Makburi, nga Ubejd ibn Xhurejxhi, se ai i tha Abdullah ibn Omerit: "O Ebu Abdurrahman, të kam parë të veprosh katër gjëra, të cilat nuk kam parë asnjë nga shokët e tu t'i veprojë!" Ai tha: "Cilat janë ato, o biri i Xhurejxhit?" Ai tha: "Të kam parë se nuk prek asnjë nga qoshet (e Qabes) përveç dy qosheve jemane; të kam parë të veshësh nalle prej lëkure të regjur (pa qime); të kam parë të lyehesh me të verdhë; dhe të kam parë se kur je në Mekë, njerëzit e fillojnë telbijen kur shohin hënën e re, ndërsa ti nuk e fillon atë derisa të vijë dita e Tervijes!" Abdullahu tha: "Sa u përket qosheve, unë nuk e kam parë të Dërguarin e Allahut (s.a.v.s.) të prekë tjetër përveç dy qosheve jemane. Sa u përket nalleve prej lëkure të regjur, unë e kam parë të Dërguarin e Allahut (s.a.v.s.) të veshë nalle që nuk kanë qime dhe merrte abdest duke i pasur ato veshur, andaj unë dëshiroj t'i vesh ato. Sa i përket ngjyrës së verdhë, unë e kam parë të Dërguarin e Allahut (s.a.v.s.) të lyehet me të, andaj dëshiroj të lyehem me të. Sa i përket telbijes, unë nuk e kam parë të Dërguarin e Allahut (s.a.v.s.) ta fillojë atë derisa kafsha e tij e udhëtimit të nisej me të."