2371 - Na kanë treguar Amër ibn Aliu dhe Muhamed ibn Ma'meri, të cilët kanë thënë: Na ka treguar Ebu Davudi, na ka treguar Xhafer ibn Abdilah ibn Uthman el-Kureshi, më ka treguar Omer ibn Urve ibn ez-Zubejri, i cili ka thënë: E kam dëgjuar Urve ibn ez-Zubejrin duke treguar nga Ebu Dherri, i cili ka thënë: Thamë: "O i Dërguari i Allahut! Si e dite se je Pejgamber?" Ai (s.a.v.s.) tha: "Nuk e kam ditur derisa u bëra me dije për këtë. Më erdhën dy engjëj teksa isha në një pjesë të luginës së Mekës. Njëri prej tyre pyeti: 'A është ky ai?' Tjetri u përgjigj: 'Peshone atë me një njeri.' U peshova me një njeri dhe unë peshova më rëndë se ai. Tha: 'Peshone atë me dhjetë.' Më peshoi me dhjetë dhe unë peshova më rëndë se ata. Pastaj tha: 'Peshone atë me njëqind.' Më peshoi me njëqind dhe unë peshova më rëndë se ata. Pastaj tha: 'Peshone atë me një mijë.' Më peshoi me një mijë dhe unë peshova më rëndë se ata. Atëherë njëri i tha tjetrit: 'Sikur ta peshoje me të gjithë umetin e tij, ai do të peshonte më rëndë se ai.' Pastaj njëri i tha shokut të tij: 'Çaje barkun e tij.' Ai ma çau barkun, nxori prej tij pjesën e shejtanit dhe një droçkë gjaku, e i hodhi ato. Pastaj njëri i tha tjetrit: 'Laje barkun e tij ashtu siç lahet ena dhe laje zemrën e tij ashtu siç lahet rroba.' Pastaj kërkoi Sekinen (qetësinë), e cila ngjante si një shkëlqim i bardhë vezullues, dhe ajo u fut në zemrën time. Pastaj njëri i tha shokut të tij: 'Qepe barkun e tij.' Ai ma qepi barkun tim dhe vendosi vulën midis shpatullave të mia. Dhe me të mbaruar këtë, ata u larguan prej meje, ndërsa unë po e vështroja këtë ngjarje drejtpërdrejt me sytë e mi."