2407 - Na tregoi Abd el-A’la ibn Hamadi, na tregoi Hamad ibn Seleme, nga Ali ibn Zejdi, nga Jusuf ibn Mihrani, nga Ibn Abbasi, se të Dërguarit të Allahut (s.a.v.s.) i erdhën dy engjëj, në atë që sheh njeriu kur është në gjumë. Njëri prej tyre u ul te këmbët e tij, ndërsa tjetri te koka e tij. Ai që ishte te këmbët i tha atij që ishte te koka: "Trego një shembull për këtë dhe një shembull për umetin e tij." Ai tha: "Vërtet, shembulli i tij dhe shembulli i umetit të tij është si shembulli i një grupi udhëtarësh që arritën në një shkretëtirë dhe nuk kishin me vete furnizim për ta kaluar atë e as për t’u kthyer. Ndërsa ata ishin në këtë gjendje, u erdhi një burrë i veshur me një petk të stolisur e me vija. Ai u tha: 'Çfarë mendoni, nëse ju çoj te kopshte të harlisura dhe te pellgje të mbushura plot me ujë, a do të më ndiqni?' Ata thanë: 'Po.' Kështu, ai u nis me ta dhe i çoi te kopshte të harlisura dhe te pellgje të mbushura plot me ujë, ku ata hëngrën dhe pinë."