Na ka treguar Ahmed bin Is'haku dhe el-Abas bin Muhamedi, të cilët kanë thënë: Na ka treguar Jahja bin Ebi Bukejri, na ka treguar Zuhejri bin Muhamedi, nga Musa bin Xhubejri, nga Nafiu, nga Ibn Umeri: se ai e ka dëgjuar Pejgamberin (s.a.v.s.) [të thotë]: "Kur Allahu i Madhërishëm e zbriti Ademin (a.s.) në tokë, melekët thanë: 'O Zot, {A do të vësh në të atë që bën çrregullime e derdh gjak, ndërkohë që ne Të lartësojmë me lavdërim e Të shenjtërojmë Ty? Ai tha: "Unë di atë që ju nuk e dini."}' [El-Bekare: 30]. Ata thanë: 'Ne jemi më të bindur ndaj Teje sesa bijtë e Ademit.' Allahu i Madhërishëm tha: 'Atëherë zgjidhni dy melekë prej melekëve, që të zbresin në tokë, e të shohim se si do të veprojnë.' Ata thanë: 'O Zoti ynë: Harutin dhe Marutin.' Kështu, ata u zbritën në tokë dhe Zuhra (Afërdita) iu shfaq atyre në formën e një gruaje prej njerëzve më të bukur. Ajo erdhi tek ata dhe ata i kërkuan asaj marrëdhënie. Ajo u tha: 'Jo, pasha Allahun, derisa të bëni shirk (t’i shoqëroni Allahut shok)' – ose një fjalë të ngjashme me këtë. Ata thanë: 'Jo, pasha Allahun, ne kurrë nuk i shoqërojmë shok Allahut.' Ajo u largua prej tyre, pastaj u kthye duke mbajtur një foshnjë me vete. Ata i kërkuan asaj marrëdhënie, ndërsa ajo u tha: 'Jo, pasha Allahun, derisa ta vritni këtë foshnjë.' Ata thanë: 'Jo, pasha Allahun, ne kurrë nuk e vrasim atë.' Ajo u largua, pastaj u kthye me një gotë me verë që e mbante me vete. Ata i kërkuan asaj marrëdhënie, kurse ajo u tha: 'Jo, pasha Allahun, derisa ta pini këtë verë.' Ata e pinë, u dehën, kryen marrëdhënie me të dhe e vranë foshnjën. Kur u erdhi vetëdija, gruaja u tha: 'Pasha Allahun, ju nuk latë gjë prej asaj që e refuzonit pa e bërë kur u dehët.' Atëherë, atyre iu dha të zgjidhnin mes dënimit të kësaj bote dhe dënimit të botës tjetër, e ata zgjodhën dënimin e kësaj bote."