٥٦١ - Prej Abdullah bin Muhamed bin Akilit transmetohet se ai ka dëgjuar Xhabir bin Abdullahun duke thënë: Më arriti një hadith prej një njeriu që e kishte dëgjuar nga i Dërguari i Allahut (s.a.v.s.). Kështu, bleva një deve, mandej shtrëngova shalën time dhe udhëtova drejt tij për një muaj derisa mbërrita në Sham, ku gjeta Abdullah bin Enisin. I thashë rojës së derës: "I thuaj se Xhabiri është te dera." Ai tha: "Biri i Abdullahut?" Thashë: "Po." Ai doli duke shkelur mbi rrobën e tij, më përqafoi dhe unë e përqafova atë. I thashë: "Më ka arritur një hadith prej teje që e ke dëgjuar nga i Dërguari i Allahut (s.a.v.s.) rreth shpagimit (kisasit), dhe u frikësova se mos vdisje ti ose unë para se ta dëgjoja atë." Ai tha: "E kam dëgjuar të Dërguarin e Allahut (s.a.v.s.) duke thënë: 'Allahu do t’i tubojë njerëzit Ditën e Kiametit - ose tha: robërit - të zhveshur, të pabërë synet dhe buhman.' Tha: Ne thamë: 'E çfarë do të thotë buhman?' Tha: 'Nuk kanë asgjë me vete. Mandej do t'u thërrasë me një zë që do ta dëgjojë ai që është larg ashtu siç do ta dëgjojë ai që është afër: Unë jam Gjykatësi (ed-Dejjan), Unë jam Sundimtari (el-Malik). Nuk i takon askujt prej banorëve të Zjarrit të hyjë në Zjarr, ndërkohë që ka një të drejtë (hakk) te ndonjë prej banorëve të Xhenetit, pa ia marrë atë (hakun) prej tij; dhe nuk i takon askujt prej banorëve të Xhenetit të hyjë në Xhenet, ndërkohë që ndonjë prej banorëve të Zjarrit ka një të drejtë te ai, pa ia marrë atë (hakun) prej tij, qoftë edhe një shuplakë.'" Tha: Ne thamë: "Si do të jetë kjo, kur ne vijmë të zhveshur, të pabërë synet dhe pa asgjë (buhman)?" Ai tha: "(Përmes) veprave të mira dhe veprave të këqija."