Transmeton Talha b. Ubejdullahu: Një burrë nga banorët e Nexhdit me flokë të shpupuritur erdhi te i Dërguari i Allahut (s.a.v.s.). Dëgjohej uturima e zërit të tij, por nuk kuptohej se çfarë thoshte derisa u afrua. Atëherë u kuptua se ai po pyeste për Islamin. I Dërguari i Allahut (s.a.v.s.) tha: "Pesë kohë namazi gjatë ditës dhe natës." Ai pyeti: "A kam detyrim tjetër përveç tyre?" Ai u përgjigj: "Jo, përveç nëse kryen ndonjë adhurim vullnetar." Pastaj i Dërguari i Allahut (s.a.v.s.) i përmendi agjërimin e muajit të Ramazanit. Ai pyeti: "A kam detyrim tjetër?" Ai u përgjigj: "Jo, përveç nëse agjëron vullnetarisht." I Dërguari i Allahut (s.a.v.s.) i përmendi edhe zeqatin. Ai pyeti: "A kam detyrim tjetër?" Ai u përgjigj: "Jo, përveç nëse jep lëmoshë vullnetarisht." Burri u largua duke thënë: "Pasha Allahun, nuk do të shtoj asgjë mbi këtë e as nuk do të pakësoj." Atëherë i Dërguari i Allahut (s.a.v.s.) tha: "Do të shpëtojë nëse ka thënë të vërtetën."