4276 - Dhe nga Ebu Hurejre - r.a. -
ka thënë:
«Kemi marrë pjesë në një xhenaze me Pejgamberin e Allahut (s.a.v.s.). Kur ai përfundoi varrimin e saj dhe njerëzit u larguan, Pejgamberi i Allahut (s.a.v.s.) tha: "Ai tani dëgjon rrahjen e nallaneve tuaja. Atij i vijnë Munkeri dhe Nekiri, sytë e të cilëve janë si kazanë bakri, dhëmbët e tyre si brirët e lopës dhe zërat e tyre si bubullima. Ata e ulin atë dhe e pyesin se çfarë adhuronte dhe kush ishte Pejgamberi i tij. Nëse ishte prej atyre që adhuronin Allahun, ai thotë: Adhuroja Allahun, dhe Pejgamberi im është Muhamedi (s.a.v.s.), i cili na erdhi me argumente të qarta, andaj ne i besuam dhe e pasuam atë. Kjo është fjala e Allahut: ﴿Allahu i forcon ata që besuan me fjalën e qëndrueshme në jetën e kësaj bote dhe në botën tjetër﴾ [Ibrahim: 27], atëherë i thuhet atij: Mbi bindjen jetove, mbi të vdiqe dhe mbi të do të ringjallesh. Pastaj i hapet një derë për në Xhenet dhe i zgjerohet varri i tij.
E nëse ishte prej njerëzve të dyshimit, ai thotë: "Nuk e di, i kam dëgjuar njerëzit duke thënë diçka dhe unë e thashë atë", atëherë i thuhet atij: Mbi dyshimin jetove, mbi të vdiqe dhe mbi të do të ringjallesh. Pastaj i hapet një derë për në Zjarr dhe lëshohen mbi të akrepa dhe gjarpërinj (dragonj), që sikur njëri prej tyre të frynte në tokë, nuk do të mbante asgjë (bimësi). Ata e kafshojnë atë dhe toka urdhërohet e e shtrëngon derisa t'i ndërthuren brinjët e tij».
E ka transmetuar Taberaniu në 'el-Evsat' dhe ka thënë: "Këtë e ka transmetuar vetëm Ibn Lehia". Unë them: Dhe në të ka diskutim.